Umukinnyi wo mu kibuga hagati mu ikipe ya Manchester City ukomoka mu Bubiligi Kevin De Bruyne yageneye impano bagenzi be bo muri iyi kipe ya telefone zigezweho z’ubwoko bwa iphone mu rwego rwo kubashimira umwaka ushize w’imikino mwiza bagize batwara ibikombe 3.
Mu mateka ya Manchester City ni ubwa mbere yaritwaye UEFA Champions League, yageretseho shampiyona y’ubwongereza Premier League imaze kugira iyayo kuko iyitwaye inshuro eshatu zikurikiranya ndetse inatwara igikombe gikuze kurusha ibindi ku isi mu mupira w’amaguru FA Cup.
Mu gukora ibi, Kevin De Bruyne w’imyaka 32 yateye ikirenge mu cya kizigenza Lionel Messi we wahaye impano bagenzi be bo mu ikipe y’igihugu ya Argentine nk’ishimwe ryo kuba baratwaye igikombe k’isi cya 2022.
Kevin De Bruyne kuri ubu utari gukina kubera ikibazo k’imvune yagiriye mu mukino wa mbere wa shampiyona ubwo bakinaga n’ikipe ya Burnley aho biteganyijwe ko azamara amezi ari hejuru y’ane hanze y’ikibuga, iyi mpano yageneye bagenzi be ikaba ihagaze agaciro ka miliyoni £5 (Pounds) ubwo ni arenga miliyari 5 ushyize mu manyarwanda.
