Ku isaha y’i saa 21:00 z’ijoro za hano i Kigali mu Rwanda, kuri uyu wa gatatu hategerejwe umukino w’igikombe kiruta ibindi ku mugabane w’iburayi UEFA Super Cup. Iki ni igikombe gihuza ikipe yatwaye igikombe cy’amakipe yabaye aya mbere iwayo ku mugabane w’iburayi UEFA Champions League n’ikipe yatwaye igikombe cy’amakipe yabaye aya kabiri iwayo UEFA Europa League.
Uyu mukino uraza guhuza ikipe ya Manchester City yo mu Bwongereza yatwaye UEFA Champions League itsinze Inter Milan yo mu Butaliyani na FC Sevilla yo muri Espagne yatwaye UEFA Europa League itsinze AS Roma yo mu Butaliyani.
UEFA Super Cup yatangijwe mu 1972 itangira gukinwa mu 1973 icyo gihe yitwaga Super Competition ubundi yitwa European Super Cup nyuma yitwa UEFA Super Cup mu 1995 ari nako ikitwa na nubu.
Imibare ijyanye n’iki gikombe ivuga iki?
FC Barcelona yo muri Espagne, Real Madrid yo muri Espagne na AC Milan yo mu Butaliyani n’izo kipe zatwaye iki gikombe inshuro nyinshi aho zagitwaye inshuro 5. Amakipe yo mu Bwongereza yabashije kwegukana iki gikombe ni Liverpool, Chelsea, Manchester United, Nottingham Forest na Aston Villa naho amakipe yo muri Espagne yatwaye iki gikombe ni Real Madrid, FC Barcelona, Valencia, Atletico Madrid na FC Sevilla.
FC Sevilla yatwaye iki gikombe inshuro imwe muri 2006 ubwo yatsindaga FC Barcelona ibitego 3-0, ni igikombe kimwe mu nshuro 6 imaze kugihanganira ni 2007, 2014, 2015, 2016 na 2020. Sevilla iraza kuba ihanganira iki gikombe ku nshuro ya 7 mu gihe Manchester City iraza kuba ihanganira iki gikombe ku nshuro yayo ya mbere kuko ni ubwambere itwaye kimwe muri ibi bikombe byo ku mugabane w’iburayi mu mateka yayo.
Ni inshuro 7 amakipe yo mu Bwongereza ahura n’ayo muri Espagne ku mukino wa UEFA Super Cup, muri izo nshuro amakipe yo mu Bwongereza yatsinze inshuro 4 naho ayo muri Espagne atsinda inshuro 3.
Mu kiganiro n’itangazamakuru umutoza wa FC Sevilla ukomoka muri Espagne Jose Luis Mendilibar yavuze ko hari ikizere cyo gutsinda ikipe ya manchester City n’ubwo ariyo ihabwa amahirwe yo gutwara iki gikombe, yavuze ko barayitsinda nk’uko Arsenal yayitsinze muri FA Community Shield. Umutoza wa Manchester City nawe ukomoka muri Espagne Pep Guadiola nawe yavuze ko gutwara iki gikombe ari intumbero kuri Manchester City n’ubwo aza gukina uyu mukino adafite zimwe mu nkingi za mwamba ze kevin De Bruyne wagize ikibazo k’imvune ndetse yavuze ko ashobora kumara igihe cy’amezi 4 hanze y’ikibuga.
UEFA Super Cup y’uyu mwaka iraba ari ya 48 mu mateka. Yagombaga kubera kuri stade ya AK Bars Arena yo mu mugi wa Kazan mu Burusiya gusa kuko iki gihugu kiri mu ntambara cyatangije kuri Ukraine yahise yimurirwa kuri Karaiskakis Stadium yo muri Piraeus ni mu Bugereki, iyi yakira abasaga 33,334, ikaba isanzwe ikiniraho ikipe ya Olympiacos.
Ikipe gikombe kuri ubu gifitwe n’ikipe ya Real Madrid iheruka kukegukana, ikipe ibashije kugitwara ihabwa akayabo miliyoni €5 ubwo ni arenga miliyari 5 z’amanyarwanda mu gihe ikipe itsinzwe yo ihabwa miliyoni €3.8 ubwo ni arenga miliyoni 4 z’amanyarwanda.
