Mu mwaka ushize w’imikino muri Mutarama ikipe ya Al Nassr yo muri Saudi Arabia nibwo yasinyishije kizigenza ukomoka muri Portugal Cristiano Ronaldo ndetse imuha akayabo. N’ubwo yamuguze ariko akanayitsindira ibitego ntibyayigendekeye neza kuko nta gikombe na kimwe yatwaye ndetse no muri shampiyona yari iya mbere gusa iza gutakaza umwanya wa mbere mu minsi ya nyuma. Ikipe ya Al Nassr yongeye kureba uko yakwiyubaka maze igura Marcelo Brozovic wavuye muri Inter Milan, Alex Telles wavuye muri Manchester United, Sadio Mane wavuye muri Bayern München n’abandi. Kwiyubaka kwayo ntibyapfuye ubusa kuko byayifashije kwegukana igikombe itsinze Al Hilal ku mukino wanyuma.
Nyuma y’imikino ya gishuti iyi kipe yakinnye harimo n’umukino yanganyijemo na Paris Saint Germain yo mu Bufaransa 0-0, kuri ubu yariri gukina imikino y’igikombe cy’Abarabu. Arab Club Champions Cup ni igikombe ngarukamwaka gihuza amakipe yo mu bihugu by’abarabu, haba abo muri Afurika n’abo muri Asia. Iki gikombe gitegurwa n’ishyirahamwe ry’umupira w’amaguru mu barabu Union of Arab Football Associations (UAFA). Cyabaga ku nshuro yacyo ya 30, kikaba cyaratangiye gukinwa ku nshuro ya mbere mu 1982, muri uyu mwaka cyabereye muri Saudi Arabia mu migi ya Abha, Al Bahah, Khamis Mushait na Taif. Gitangirana n’amakipe 37 ubundi agakina amajonjora hanyuma hakaboneka amakipe 16 yigabanya mu matsinda 4, muri buri tsinda hakajyamo amakipe 4.
Ikipe ya Al Nassr ya Cristiano Ronaldo yari yisanze mu itsinda C aho yari kumwe na Al Shabab nayo yo muri Saudi Arabia, Zamalek yo mu Misiri na US Monastir yo muri Tunisia. Al Nassr yazamutse muri iri tsinda ari iya 2 nyuma ya Al Shabab n’amanota 5, muri 1/4 k’irangiza yahise ihura na Raja Casablanca yo muri Maroc yari yabaye iya 1 mu itsinda D, Al Nassr iyikuramo ku bitego 3-1 ihita igera muri 1/2 k’irangiza aho yahuye na Al Shorta yo muri Iraq maze igitego kimwe rukumbi cya Cristiano Ronaldo gitandukanya impande zombi nuko Al Nassr igera ku mukino wanyuma ityo.
Ku rundi ruhande ikipe ya Al Hilal nayo yo muri Saudi Arabia yisanze mu itsinda B aho yarikumwe na Al Sadd yo muri Qatar, Wydad Casablanca yo muri Maroc na Al Ahli Tripoli yo muri Libya inakinamo abanyarwanda MUGISHA Bonheur bakunze kwita Casemiro na MANZI Thierry. Muri iri tsinda Al Hilal yazamutse ari iya kabiri nyuma ya Al Sadd n’amanota 4. Muri 1/4 k’irangiza yahise icakirana na Al Ittihad Jeddah nayo yo muri Saudi Arabia irimo abakinnyi nka Karim Benzema na N’Golo Kante, umukino waje kurangira Al Hilal itsinze ibitego 3-1 maze igera muri 1/2 k’irangiza aho yahise ihura na Al Shabab nayo yo muri Saudi Arabia nayo ibasha kuyikuramo iyitsinze ibitego 3-1 niko kugera ku mukino wanyuma. Ikipe ya Al Hilal irimo abakinnyi bakomeye nka Kalidou Koulibaly wavuye muri Chelsea, Ruben Neves wavuye muri Wolverhamton Wanderers, Sergej Milinković-Savić wavuye muri Lazio na Malcom wanyuze muri FC Barcelona n’abandi.
Umukino wanyuma rero warutegerejwe iri joro wagombaga guhuza Al Hilal yanatwaye iki gikombe ubugira 2 n’ikipe ya Al Nassr itarizi uko gihumura, wagombaga kubera kuri stade y’igihugu King Fahd Stadium iri mu murwa mukuru wa Saudi Arabia, Riyadh. Igice cya mbere cyarangiye amakipe yombi anganya 0-0. Mu gice cya kabiri cy’umukino ku munota wa 51 ku mupira mwiza wazamuwe na Malcom, umunya-brazil Michael yahise aterekamo igitego kiza cy’umutwe ku ruhande rwa Al Hilal. Bidatinze ku munota wa 71 myugariro wa Al Nassr Abdulelah Al-Amri yahawe ikarita itukura ku ikosa yarakoreye Sergej Milinković-Savić, ikizere cyo kwishyura ku ruhande rwa Al Nassr cyayoyotse cyane ko bari basigaye ari 10 mu kibuga. Ntibyatinze ariko ku munota wa 74 uwitwa Sultan Al-Ghannam atera umupira ugana mu izamu maze Cristiano Ronaldo ashyiraho ikirenge igitego cyo kwishyura kiba kirabonetse ndetse iminota isanzwe y’umukino irangira amakipe yombi anganya 1-1. Hagati aho ariko umukinnyi wa Al Nassr Nawaf Al-Boushail nawe yahawe ikarita itukura ku munota wa 78 n’ubwo atari mu kibuga.
Hiyambajwe iminota 30 ya kamarampaka, n’ubwo ikipe ya Al Nassr yarisigaranye abakinnyi 10 mu kibuga, ntibyababujije ko ku munota wa 98 Cristiano Ronaldo yatsinze igitego cya kabiri cy’umutwe maze ibitego biba 2-1. Umutoza wa Al Nassr Luis Castro yaje guhabwa ikarita itukura nawe ku munota w’103 kubera kutitwara neza. Al Hilal yakomeje kwataka ishaka kwishyura ariko bikomeza kunanirana ndetse umukino urangira Al Nassr itsinze Al Hilal ibitego 2-1.
Al Nassr ni ubwambere mu mateka yayo yaritwaye igikombe cy’abarabu kuva aho yabereye. Cristiano Ronaldo wavuye mu kibuga umukino utarangiye kubera imvune niwe watsinze ibitego byinshi muri iri rushanwa aho yatsinze ibitego 4 agakurikirwa na Karim Benzema watsinze 3, Sergej Milinković-Savić wa Al Hilal ni we wabaye umukinnyi mwiza w’irushanwa, Nawaf Al-Aqidi umuzamu wa Al Nassr ni we wabaye umuzamu w’irushanwa.
Muri iki gikombe ikipe ya mbere ihabwa miliyoni 6 z’amadorali y’Amerika ubwo n’arenga miliyari 6 z’amanyarwanda, mu gihe iya kabiri ihabwa miliyoni 2.5 z’amadorali y’Amerika. Avuzwe haruguru ariko ni ay’igikombe gusa hari n’ahabwa uwarenze ikiciro runaka ayo ni yo uteranya ugasanga ikipe ya Al Nassr yatwaye igikombe yahawe miliyoni 10 z’amadorali y’Amerika muri rusange. N’uko Cristiano Ronaldo yegukanye igikombe cyambere muri Al Nassr, kuri ubu akaba yujuje ibikombe 35 ku myaka 38.
