Haciyeho amasaha make ikipe ya Bayern Munich yo mu Budage itangaje ko yasinyishije rutahizamu w’umwongereza Harry Kane imukuye mu ikipe ya Tottenham Hotspur yo mu Bwongereza. Ni ikipe ya Bayern Munich iherutse kwegukana igikombe cya Shampiyona y’igihugu y’Ubudage Bundesliga, yagombaga gukinira igikombe kiruta ibindi mu Budage DFL Super Cup gihuza ikipe yatwaye shampiyona n’iyatwaye igikombe k’igihugu (ugereranyije ni nka FERWAFA Super Cup yo mu Rwanda yahuzaga APR FC yatwaye shampiyona na Rayon Sports yatwaye igikombe cy’Amahoro). Uyu ni n’umukino ubimburira shampiyona.
Ni umukino wahuzaga ikipe ya Bayern Munich yatwaye shampiyona na RB Leipzig yatwaye igikombe cy’igihugu cya DFB Pokal. Bayern Munich nk’ikipe y’ubukombe ni yo yahabwaga amahirwe yo gutwara iki gikombe gusa yaje gukubitwa nk’izakabwana n’ubwo bakiniraga no kuri stade yabo ya Allianz Arena. Ikipe ya RB Leipzig ibifashijwemo na rutahizamu ukomoka muri Espagne Dani Olmo yatsinze ibitego 3 ku busa, igitego cya mbere cyagiyemo ku munota wa 3, icya kabiri kijyamo ku munota wa 44 naho icya gatatu kijyamo ku munota wa 68 kuri Penaliti, byose uko ari bitatu byatsinzwe na Olmo. Bayern Munich ntiyigeze ibasha kureba mu izamu rya Leipzig mu mukino wose.
Rutahizamu Harry Kane winjiye mu kibuga asimbuye ku munota wa 63 yari amahirwe kuri we yo kuba yakwegukana igikombe cyambere mu mateka ye. N’ubwo ari rutahizamu ukomeye wahize abandi mu gutsinda ibitego byinshi muri shampiyona y’igihugu y’Ubwongereza Premier League ubugira gatatu, akaba ari we watsindiye ikipe y’igihugu y’Ubwongereza ibitego byinshi mu mateka yayo ndetse n’ikipe ya Tottenham Hotspur bikaba ari uko, kuri ubu kandi akaba ari we mukinnyi wa kabiri watsinze ibitego byinshi muri shampiyona y’ubwongereza Premier League n’ibitego 213 aho akurikora Alan Shearer watsinze 260, gusa uyu rutahizamu w’imyaka 30 y’amavuko ikitwa igikombe acyumva nk’inzozi kuko ntacyo agira. DFL Super Cup nayo ikaba yiyongereye mu bikombe biciye Harry Kane mu myanya y’intoki nyuma ya UEFA Champions League, Euro n’ibindi, ububiko bwe bw’ibikombe bukomeje kwambara ubusa.
