Ikipe ya Paris Saint Germain isanzwe ikinamo Kylian Mbappe na Neymar, nyuma y’uyu mwaka w’imikino yatandukanye n’abakinnyi barimo kizigenza Lionel Messi na Sergio Ramos. Kuva iyi kipe yagurwa n’abaherwe bo muri Qatar intumbero yabaye kuba ikipe y’ubukombe, mu Bufaransa byarakunze gusa ku ruhando mpuzamahanga bikomeza kugorana kuba yatwara amarushanwa nka UEFA Champions League. N’ubwo rero itarizera kugumana Kylian Mbappe gusa kuri ubu iri gusinyisha abakinnyi batandukanye barimo Marcos Assensio wavuye muri Real Madrid na Lucas Hernandez wavuye muri Bayern Munich n’abandi. Kuri ubu rero ikipe ya PSG irifuza rutahizamu ukiri muto ukomoka muri Portugal Gonçalo Matias Ramos ndetse n’umufaransa Ousmane Dembélé nawe ukina asatira.
PSG yifuza rutahizamu Gonçalo Matias Ramos w’imyaka 22 ukinira ikipe ya Benfica y’iwabo muri Portugal kuri miliyoni €80 ndetse ngo ikipe ya Benfica ntiteganya kuzanga, bivuze ko ku kigero kinini uyu musore agomba gusinyira ikipe ya PSG ni nyuma y’uko iyi kipe ibonye ko uwitwa Dusan Vlahovic kumukura mu ikipe ya Juventus bigoranye. Si uyu musore gusa kuko ikipe ya PSG yiteguye no gutanga miliyoni €50 kuri rutahizamu w’umufaransa usanzwe ukinira ikipe ya FC Barcelona Ousmane Dembélé w’imyaka 26 ndetse ngo Démbéle yaganiriye n’umutoza wa FC Barcelona Xavi Hernandez amubwira ko ashaka kugenda. Aba bombi bidatinze barasinyira ikipe ya PSG amasezerano azabageza muri 2028.
