Ni umunsi wa 3 w’irushanwa nyafuri mu mukino wa basketball mu bari n’abategarugori FIBA women’s Africa riri kuba ku nshuro yaryo ya 28 riri kubera mu Rwanda muri BK Arena. Irushanwa ryatangiye ku munsi wo ku wa gatanu aho u Rwanda rwakinnye umukino warwo wa mbere maze rubasha no kwitwara neza rutsinda Côte d’Ivoire amanota 64-35.
Kuri uyu munsi u Rwanda ruri mu itsinda rya mbere A ruraza gukina umukino wa kabiri wo mu matsinda aho ruribukine na Angola yo yatsinzwe umukino wa mbere ku munsi w’ejo itsindwa na Côte d’Ivoire ni umukino utegerejwe ku i saa 18:00 z’umugoroba. Mu kiruhuko nyuma y’igice cya mbere umuraperi ukomoka muri Algeria gusa ukorera umuziki mu Bufaransa La Fouine niwe uri bususurutse abitabira uyu mukino naho nyuma y’umukino umuhanzi uri mu bagezweho hano mu Rwanda Chriss Eazzy nawe aratarabira abitabiriye iyi mikino, umuvangazamuziki DJ Kevin Klein nawe araba ahabaye. Indi mikino itegerejwe uyu munsi ni Cameroon na Guinea, Misiri na Nigeria, u Rwanda na Angola naho Senegal ikine na Mali saa 21:00 za nijoro.
Ni mu gihe kandi ishyirahamwe ry’umukino wa basketball mu Rwanda FERWABA ryatangaje ko ushaka kugura umwambaro ikipe y’u Rwanda iri gukinana muri iri rushanwa yayigura amafaranga ibihumbi ijana by’amafaranga y’u Rwanda (100,000 RWF). Ni amafaranga ataravuzweho rumwe kuko ari menshi, naho imipira isanzwe yagenewe abafana ni ibihumbi cumi n’abitanu by’amafaranga y’u Rwanda (15,000 RWF).
