Amakipe menshi yo muri Saudi Pro League muri Saudi Arabia akomeje kurwana urugamba rwo kwiyubaka binajyana no kwamamaza igihugu cyabo igura abakinnyi batandukanye bamenyerewe ku mugabane w’iburayi. muri iri soko ry’igura n’igurisha aya makipe atandukanye yo muri Saudi Arabia yamaze kwibikaho abarimo Ruben Neves, Kalidou Koulibaly, Karim Benzema, N’Golo Kante, Edourd Mendy, Roberto Firmino n’abandi, abarimo Riyad Mahrez ukomoka muri Algeria nawe yamaze kumvikana n’ikipe ya Al Ahli ku masezerano. Ukurikiyeho ni umusore ukomoka muri Senegal ukinira ikipe ya Bayern Munchen yo mu Budage Sadio Mane.
Nyuma y’uko ikipe ya Al-Nassr isanzwe ikinamo Cristiano Ronaldo itakarije igikombe mu mwaka ushize w’imikino maze ikaba iya 2, kuri ubu yakomeje urugendo rwo kwiyubaka, yamaze gusinyisha myugariro wo ku ruhande rw’ibumoso Alex Telles ukomoka muri Brazil yavanye muri Manchester United n’umukinnyi wo mu kibuga hagati ukomoka muri Croatia wavuye muri Inter Milan Marcelo Brozovic. Kuri ubu ngo ibiganiro na rutahizamu ukomoka muri Senegal ngo byamaze kugenda neza ndetse ikipe ya Bayern Munich yamaze kwemera amafaranga Al-Nassr iri gutanga kuri Sadio Mane angana na miliyoni £34 ndetse akaba ari nayo mafaranga azajya ahembwa ku mwaka nk’uko tubikesha James Benge ukurikirana ubuzima bwa hafi bw’uyu mukinnyi, ntamananiza kuko na Sadio Mane ku ruhande rwe yemera kujya muri iyi kipe.
Sadio Mane w’imyaka 31 y’amavuko yakiniye amakipe arimo Metz yo mu Bufaransa, RB Salzburg, Southampton, Liverpool ndetse na Bayern Munich yakiniraga none. Mu mwaka ushize w’imikino yakinnye imikino 30 atsinda ibitego 12, atanga imipira ivamo ibitego 5 mu marushanwa yose.
