Umukinnyi wo mu kibuga hagati, w’imbaraga, utsinda imipira y’imiterekano, utanga imipira ivamo ibitego, amacenga n’umuvuduko icyo ni igisobanuro cya Dimitri Payet umusore w’umufaransa wakiniraga ikipe ya Olympique de Marseille yo mu Bufaransa. Payet wakunzwe na benshi akaba yatangaje ko atazakomezanya n’ikipe ya Marseille yaramazemo imyaka 8.
Dimitri Payet w’imyaka 36 yatangiriye gukina umupira w’amaguru mu ikipe y’abana ya St Philippe mu 1995 yo ku kirwa cy’ubufaransa Réunion ari naho yavukiye, aza gukina mu ikipe nkuru bwambere muri 2004 ubwo yakiniraga ikipe ya AS de l’Excelsior nayo y’iwabo. Nyuma yaje gukinira Nantes, Saint-Étienne, Lille, ubundi ajya muri Marseille ahamara imyaka 2 ahava ajya mu Bwongereza mu ikipe ya West Ham United nyuma muri 2017 yongera kugaruka mu ikipe ya Marseille akaba yari na captain wayo.
Mu marira menshi rero Dimitri Payet akaba yatangaje ko atazakomezanya n’iyi kipe ndetse ko atari ko we yabyifuje, gusa ntiyatangaje aho yerekeje. Ubwo yari mu kiganiro n’itangazamakuru byamurenze nuko araturika ararira. Mu mikino 326 yakiniye ikipe ya Marseille yayitsindiye ibitego 78 atanga imipira ivamo ibitego 95 mu marushanwa yose. Payet ariko abisikanye na rutahizamu ukomoka muri Gabon Pierre-Emerick Aubameyang wamaze gusinyira iyi kipe amasezerano y’imyaka 3 ayikinira.
