Nyuma yo kugira umwaka mwiza w’imikino uheruka, ikipe ya Newcastle United ikongera gusubira mu marushanwa mpuzamahanga yo ku mugabane w’iburayi ariko by’umwihariko UEFA Champions League yaherukagamo mu myaka 21 ishize, ikomeje no kwiyubaka ngo itazitabira gusa ahubwo izanahangane. Kuri ubu yamaze kwibikaho myugariro w’Umutariyani Sandro Tonali wavuye muri AC Milan ndetse amakuru ahari ni uko yamaze no kwibikaho rutahizamu w’umwongereza Harvey Barnes.
Harvey Barnes ni umusore w’imyaka 25 wakiniraga ikipe ya Leicester City yamanutse mu kiciro cya kabiri. Uyu musore wataka aciye ku ruhande akaba agomba kugurwa miliyoni £38, amakipe yombi yamaze kumvikana ndetse Barnes nawe arashaka gukinira Newcastle United. Barnes mu mwaka ushize w’imikino yakinnye imikino 40, atsinda ibitego 13, atanga imipira yavuyemo ibitego 3 mu marushanwa yose, bimwe mu byo arusha abandi ni umuvuduko ndetse n’amacenga mu gihe afite umupira. Ibya Harvey Barnes bikimara gucamo, ni nako agomba kubisikana na rutahizamu w’umufaransa Alain Saint-Maximin wifuzwa n’ikipe ya Al-Ahli yo muri Saudi Arabia.
