Ikipe ya Chelsea ikomeje urugamba rwo kwiyubaka cyane ko umwaka ushize w’imikino utayigendekeye neza. Mu isoko ry’igura n’igurisha ry’iyi mpeshyi yagaragaye cyane irekura abakinnyi barimo Kai Havertz, Christian Pulisic, Kalidou Koulibaly, Ruben Loftus-Cheek, Edouard Mendy, Cesar Azpilicueta n’abandi. Amaso ubu iyahanze umukinnyi wo mu kibuga hagati w’ikipe ya Brighton & Hove Albion ukomoka muri Ecuador Moise Caiçedo n’ubwo ibye bikomeje kunanirana.
Nyamara ariko bitunguranye iyi kipe yaje kwisanga mu matsa ni nyuma yaho myugariro wayo Wesley Fofana ukomoka mu Bufaransa agiriye ikibazo k’imvune ndetse akaba yabazwe mu ivi.
Ibi byanatumye atajyana na bagenzi muri Leta zunze Ubumwe z’Amerika mu myiteguro y’umwaka w’imikino ugiye kuza. Binahurirana n’imvune ya Fofana ikipe ya Chelsea irifuza myugariro w’imyaka 25 ukinira ikipe ya AS Monaco mu Bufaransa Axel Disasi ngo abe yaba umusimbura wa Fofana.
Ikipe ya Chelsea kandi ikomeje guhamya ko myugariro uherutse kuva mu ntizanyo mu ikipe ya Brighton & Hove Albion umwongereza w’imyaka 20 Levi Colwill atagurishwa ko ahubwo agomba kuguma muri iyi kipe.
