Ikipe y’Arsenal yari imaze igihe kitari gito yiruka ku mukinnyi wo mu kibuga hagati w’ikipe ya West Ham United akaba na captain wayo, umwongereza Declan Rice. Byatangiye ari umukinnyi ihanganiye na Manchester City gusa Manchester City iza kubivamo nyuma kuko Arsenal yaritanze amafaranga menshi kuyirusha. Nyamara ariko n’ubwo Arsenal yari ifite amahirwe menshi yo gusinyisha uyu musore byari bitaremezwa ndetse ukabona ko bitinda mu mayira ari nako inkuru nyinshi zitandukanye zivugwa.
Ku munsi wo ku wa 4 tariki ya 13 Nyakanga, Rice yagaragaye akorana imyitozo n’umunya-portugal Bruno Fernandes uzanaba captain w’ikipe ya Manchester United mu mwaka utaha w’imikino. Ibi byaciye igikuba hikangwa ko wabona habayeho gapapu Rice akereza muri Manchester United aho kujya muri Arsenal. Si ibyo gusa kandi kuko uko kurangiza ibyo gusinyisha Declan Rice muri Arsenal byatindaga ni nako abafana b’iyi kipe babaga bafite igihunga cyane ko uyu ari umukinnyi w’umuhanga hashobora kugira indi kipe imusinyisha mbere yabo, ibi byatumaga bahumeka insigane binatewe n’igihe yararirimbwe.
Kuri uyu munsi wa gatandatu w’icyumweru rero Arsenal byose yabishyizeho akadomo maze isinyisha Declan Rice kuri miliyoni ÂŁ100 n’izindi miliyoni ÂŁ5 zizahabwa West Ham United bijyanye n’uko Rice yitwaye. Declan Rice akaba yavuze ko yemeye kuza muri Arsenal nyuma yo kuganira n’umutoza wayo Mikel Arteta ndetse yasinye amasezerano y’imyaka 5 azamugeza 2028 akazajya ahembwa ÂŁ250,000 ku cyumweru, ikiyongereyeho ni we mukinnyi w’umwongereza uguzwe amafaranga menshi kurusha abandi bose babayeho mu mateka, azajya yambara nimero 41 mu mugongo.
Mu mafoto Arsenal yanyujije ku mbugankoranyambaga zayo yerekanaga umutoza Mikel Arteta na sport director w’Arsenal Edu Gaspard hamwe na Declan Rice w’imyaka 24 asinya amasezerano. Declan Rice abaye umukinnyi wa gatatu iyi kipe isinyishije muri iri soko ry’igura n’igurisha nyuma ya Kai Havertz wavuye muri Chelsea na Jurrien Timber wavuye muri Ajax Amsterdam.
