Kuri uyu munsi wo ku wa gatanu saa 15h00 tariki ya 14 Nyakanga 2023 ku kibuga cya Skol mu Nzove ikipe ya Rayon Sports bakunze kwita Gikundiro cyangwa Saro ry’i Nyanza iraza gutangira imyitozo. Ni imyitozo iri butangizwe ku mugaragaro na perezida w’iyi kipe Rtd captain UWAYEZU Jean Fidele nk’uko iyi kipe yabinyujije ku mbugankoranyambaga zayo.
Muri iri soko ry’igura n’igurisha ry’abakinnyi Rayon Sports yongeyemo abakinnyi n’ubwo hari n’abandi bagiye. Mu myitozo y’uyu munsi abafana b’iyi kipe bakwitega kubona zimwe mu ntwaro nshya zayo harimo SERUMOGO Ally wavuye muri Kiyovu Sports, BUGINGO Hakim wavuye muri Gasogi United, NSABIMANA Aimable wavuye muri Kiyovu Sports, umugande Charles Baale wavuye muri Villa Sports Club wanamaze gusinya amasezerano, umurundi Aruna Moussa wavuye muri Bumamuru n’umugande Simon Tamale wavuye muri Maroons FC, ni mu gihe Youssef Rhab nawe wamaze kumvikana na Rayon Sports agomba kugera mu Rwanda mu minsi iri imbere. Umutoza mushya wa Rayon Sports ukomoka muri Tunisia Yamen Zelfani biteganyijwe ko araza kugera mu Rwanda mu cyumweru gitaha ku munsi wo ku wa mbere.
