Umupira w’amaguru ni umwe mu mikino ukunzwe cyane kurusha iyindi yose ku isi, ndetse ikinwa henshi ku isi. Benshi mu bakinnyi bayikuyemo ubuzima abandi ibagira ibitangaza. Muri iyi nkuru turifashisha ikinyamakuru Wealth Gorilla kimenyerewe mu kwandika ibijyanye n’imitungo maze turebere hamwe abakinnyi b’umupira w’amaguru yaba abagikina n’abatagikina bakize cyane kurusha abandi muri uyu mwaka wa 2023.
10. Alexandre Pato
Uyu ni umukinnyi w’imyaka 33 ukomoka muri Brazil, yakiniye amakipe arimo Corinthians, Inter Milan, Chelsea, Villarreal na AC Milan, kuri ubu akaba akinira São Paulo iwabo muri Brazil.
Umutungo wa Pato ukaba warazamutse kubera ubushoramari burimo gucuruza imitako n’amavuto by’abagore, inzoga za Vodka, inzu z’uburiro (restaurants), imideli ndetse n’ibindi. Kuri ubu akaba atunze akayabo ka miliyoni $150
9. Ronaldo Nazário
Uyu we arazwi cyane nka Ronaldo, R9, O Fenômeno ndetse nk’umwe mu bataka beza babayeho mu mupira w’amaguru aho yakiniye amakipe arimo Real Madrid, Inter Milan, FC Barcelona, AC Milan n’ayandi.
Kuri ubu Ronaldo w’imyaka 44 afite amakipe abiri y’umupira w’amaguru ariyo Real Valladolid yo muri Espagne na Cruzeiro y’iwabo muri Brazil. Atunze imodoka nyinshi zihenze n’inzu z’ibitangaza, ndetse ngo ubukungu bwe byumwihariko buturuka mu bushoramari. Uyu mugabo utagikina akaba ari ku mwanya wa 9 nk’umukinnyi/uwakinnye umupira w’amaguru utunze agatubutse na miliyoni $160.
8. Wayne Rooney
Wayne Ronney ni umwe mu bataka beza babayeho muri shampiyona y’ikiciro cya mbere mu Bwongereza English Premier League, aho yamenyekanye mu ikipe ya Everton na Manchester United.
Kuri ubu uyu mugabo w’imyaka 37 ni umutoza w’ikipe ya DC United yo muri Leta zunze Ubumwe z’Amerika. Nyuma yo gutsindira ikipe ya Manchester United ibitego byinshi kurusha undi wese waba warayikiniye, afitanye ubufatanye n’inganda zikomeye ku isi harimo Nike, Nokia, Ford, Asda na Coca-Cola. Kuri ubu rero akaba atunze akayabo ka miliyoni $170.
7. Zlatan Ibrahimovic
Uyu mugabo ufite ibisekuru muri Bosnia na Croatia ariko akaba yaravukiye muri Sweden(Suede), ni umwataka w’imyaka 41, uherutse gusezera mu gukina umupira w’amaguru nk’uwabigize umwuga, yakiniye amakipe arimo Manchester United, Ajax Amsterdam, AC Milan, FC Barcelona, Juventus na Paris Saint Germain.
Ibrahimovic wagiranye ubufatanye na Nike, kuri ubu akaba yaraguze imigabane ya 23.5% mu ikompanyi y’indege y’iwabo muri Sweden ya Hammarby IF ndetse akaba anazwi mu gukoresha imbugankoranyambaga, kuri ubu akaba atunze akayabo ka miliyoni $190.
6. Neymar
Neymar da Silva Santos Júnior w’imyaka 31 ni umwe mu bakinnyi impano zabo z’umupira zidashidikanywaho, uyu musore ukomoka muri Brazil akaba kuri ubu akinira ikipe ya Paris Saint Germain gusa yanakiniye Santos na FC Barcelona. Neymar yatangiye kwinjiza agatubutse ubwo yarafite imyaka 17 kubera impano yagaragazaga.
Neymar yagiye agirana amasezerane n’amakompanyi akomeye ku isi harimo nka Volkswagen, Tenys Pé Baruel, Lupo, Ambev, Claro, Unilever, Santander, Puma, Panasonic n’izindi. Yanakoranye n’ikigo cy’abanyamerika cya Nike gusa baza gusesa amasezerano muri 2020 ubwo uyu musore yashinjwaga ihohotera rishingiye ku gitsinda. Kuri ubu Neyma atunze akayabo ka miliyoni $200 ni numwe mu bakinnyi bakurikirwa cyane ku rubuga rwa Instagram aho akurikirwa n’abarenga milino 200.
5. Dave Whelan
Iri zina ntirikunze kugaruka kenshi mu matwi ya benshi gusa Dave Whelan ni umusaza w’imyaka 88, akaba umwongereza, yakiniye amakipe arimo Blackburn Rovers na Crewe Alexandra, akaba yarakinaga nka rutahizamu w’ibumoso, yarangije gukina mu 1966.
Whelan akaba afite iduka rya JJB Sports iri ricuruza ibijyanye n’uburobyi, yanigeze kubaho nyirikipe yo mu Bwongereza ya Wigan Athletic. Kuri ubu akaba atunze akayabo ka miliyoni $210.
4. David Beckham
Beckham ni umukinnyi w’umwongereza wakiniye amakipe atandukanye harimo Real Madrid, Manchester United, Paris Saint Germain n’ayandi ndetse yarekeye gukina umupira w’amaguru nk’uwabigize umwuga muri 2013.
Uyu mugabo w’imyaka 47 ahanini akijijwe n’amasezerano akomeye agiye afite harimo ayo afitanye na Adidas ya milino $160 ndetse ni ay’ubuzima bwe bwose, uruganda rw’imodoka rwa Maserati, EA Sports n’izindi. Uyu mugabo ni nawe nyirikipe yo muri Leta zunze Ubumwe z’Amerika ya Inter Miami iherutse kugura kizigenza Lionel Messi. Kuri ubu David Beckham akaba atunze akayabo ka miliyoni $450.
3. Cristiano Ronaldo
Cristiano ni umukinnyi ukomoka muri Portugal w’imyaka 38, ukinira ikipe ya Al-Nassr yo muri Saudi Arabia, gusa yakiniye andi makipe arimo Sporting Lisbon, Manchester United, Real Madrid na Juventus. Kugeza ubu niwe mukinnyi watsinze ibitego byinshi kurusha abandi mu mateka y’umupira w’amaguru.
Nyuma y’umushahara nk’umukinnyi Cristiano Ronaldo yagiye yinjiriza mu bikorwa bitandukanye birimo kwikorera no gucuruza inkweto, imyenda y’imbere, application za telephone, gusinyana amasezerano na kompanyi zikomeye n’ibindi. Ikindi gice kinjiriza Cristiano agatubutse ni imbugankoranyambaga aho akurikirwa n’abarenga miliyoni 700 ku mbuga zose (Facebook, Instagram na Twitter), aha akaba asaruramo asaga miliyoni $936 mu mwaka. Kuri ubu Cristiano Ronaldo akaba atunze akayabo ka miliyoni $500.
2. Lionel Messi Lionel Messi (Net Worth) – $600 million
Lionel Messi ni rutahizamu w’imyaka 36 ukinira ikipe ya Inter Miami, wanakiniye andi makipe nka FC Barcelona na Paris Saint Germain, uyu mugabo akaba akomoka muri Argentina ndetse niwe mukinnyi watwaye ballon d’or nyinshi mu mateka y’umupira w’amaguru kuko yatwaye 7.
Messi atunze iby’agaciro byinshi harimo imodoka nyinshi n’inzu. Ibirenze ku mushahara we nk’umukinnyi, Messi yinjiza amafaranga avuye ku imbugankoranyambaga aho akurikirwa bwa kabiri nyuma ya Cristiano Ronaldo, amasezerano afitanye n’ibigo bitandukanye harimo Gillette, Turkish Airlines, Ooredoo, and Tata Motors, Pepsi, Adidas n’ibindi ndetse yamamaza ubukerarugendo bwa Saudi Arabia. Kuri ubu Lionel Messi atunze akayabo ka miliyoni $600.
1. Faiq Bolkiah (Net Worth) – $20 billion
Uyu musore w’imyaka 25 wavukiye muri Leta Zunze Ubumwe z’Amerika ariko akaba akomoka muri Brunei(igihugu cyo muri Asia), kuri ubu akaba akinira ikipe ya Ratchaburi ikina mu kiciro cya mbere muri Thailand, akaba akina nka myugariro wo ku ruhande.
Ubukungu bwa Faiq Bolkiah bukaba ahanini bushingiye ku kuba aturuka mu muryango ukize aho iwabo bafite ibirombe bicukura amavuta. Uyu musore akaba atunze akayabo ka miliyari $20. Akaba ariwe mukinnyi wambere ukize mu mupira w’amaguru.
Uru nirwo rutonde rw’akakinnyi/abahoze bakina bakize cyane kurusha abandi ku isi. Ikimenyetso cya “$” twakoresheje ku mafaranga gisobanura amadorali y’Amerika. Uru rutonde rurahindagurika uko umwaka utashye niyo mpamvu rimwe na rimwe binatewe n’urubuga wakoresheje uzabona rushobora kudahura n’uru.
