Ni we mukinnyi wenyine uvuka muri Espagne wabashije gutwara ballon d’or, yakinnye mu makipe akomeye ku isi harimo FC Barcelona na Inter Milan ndetse yakinaga mu kibuga hagati kuri ubu rero akaba yitabye Imana, yari umugabo w’imyaka 88 amazina ye ni Luis Suárez Miramontes.
Luis Suárez Miramontes bataziraga ‘Luisito’ yavutse tariki ya 2 Gicurasi 1935 kuri ubu yarafite imyaka 88, avukira Corunã muri Espagne. Akaba yarakinaga nk’umukinnyi wo mu kibuga hagati aho yakinnye mu makipe atandukanye harimo Deportivo La Corunã, CD Condal, FC Barcelona, Inter Milan na Sampdoria ari naho yarangirije gukina umupira nk’uwabigize umwuga mu 1973. Yakomereje mu mwuga w’ubutoza aho yatoje amakipe arimo Genoa Primavera, Inter Milan, Cagliari, SPAL, Como, Deportivo La Corunã, ikipe y’igihugu ya Espagne y’abatarengeje imyaka 21 ndetse n’ikipe nkuru na Albacere.
Luis Suárez Miramontes mu mikino 595 yakinnye, yatsinze ibitego 151, atwara ibikombe 14 harimo ibyo yatwariye muri FC Barcelona nka shampiyona zo muri Espagne 2, Super Copa d’Espagnã 2 n’ibikombe byahuzaga imigi 2; ibindi bikombe yabitwaye muri Inter Milan harimo shampiyona zo mu Butaliyani 2, ibikombe mpuzamigabane (Intercontinental cup) 2 na UEFA Champions League 2 naho ikindi gikombe yagitwaranye n’ikipe y’igihugu ya Espagne, cyari igikombe cy’amakipe y’igihugu y’iburayi (Euro). Yatwaye ballon d’or mu 1960 bimugira umukinnyi wambere uvuka muri Espagne uyitwaye ndetse ni nawe wenyine wabashije kuyitwara wenyine kugeza ubu.
Amakipe yakiniye arimo FC Barcelona na Inter Milan niyo yahamije ko uyu mugabo yitabye Imana mu mugi wa Milan mu Butaliyani kuri iki cyumweru tariki ya 9 Nyakanga 2023.
Kuki bavuga ko Luis Suárez Miramontes ariwe mukinnyi wenyine uvuka muri Espagne watwaye ballon d’or kandi na Alfredo di Stefano yarayitwaye?
Igisubizo k’iki kibazo ni uko Alfredo di Stefano ubundi yavukaga muri Argentina ahubwo nyuma aza gufata ubwenegihugu, bivuze ko n’ubwo yari umunya-espagne mu mpapuro ariko yari umunya-argentine mu maraso ndetse ninaho yavukiye.
