Kuri ubu ikipe ya Rayon Sports ikomeje kwitegura imikino y’umwaka utaha wa 2023/24 harimo Shampiyona, igikombe cy’amahoro, imikino nyafurika n’ibindi bikombe bitandukanye, uretse gusinyisha abakinnyi iranitegura mu buryo bw’imyambaro.
Burya ngo kwambara ukaberwa bisaba kwambara neza. Ibinyujije ku mbugankoranyambaga zayo, ikipe ya Rayon Sports ikunzwe n’abatari bake mu Rwanda yamaze kwemeza ko yasinyanye amasezerano n’inzu y’imideli ya Kwesa collection. Iyi nzu ikaba ariyo izajya yambika ndetse ikanacuruza imyambaro y’iyi kipe muri uyu mwaka w’imikino ugiye kuza.
Kwesa collection si nshya mu maso y’abanyarwanda kuko ifite imyambaro yihariye ndetse ikunzwe n’abatari bake haba mu Rwanda ndetse no mu mahanga.
Ibyamamare bitandukanye byagiye bigaragara byambaye imyambaro y’iyi nzu harimo nka Papa Cyangwe, Miss Muyango, Reagann RUGAJU, MC Brian, ISHEJA Sandrine ndetse n’abandi.
