Mu mikinire mishya igezweho mu mupira w’amaguru usanga umupira utangirira ku muzamu ubundi ukabona kujya imbere, ntabwo ari nka kera aho umuzamu yahuraga umupira ashakisha bagenzi be. Ibi rero bisigaye bisaba ko umuzamu nawe aba azi gukinisha amaguru. Iki nicyo kibazo ikipe ya Manchester United yahuye nacyo kuko umuzamu wayo ukomoka muri Espagne David De Gea ni umuzamu mwiza ariko akomeza kunegwa n’umutoza Erik Ten Hag ko adakinisha amaguru bityo ko atariwe muzamu mwiza iyi kipe ikeneye.
Ibi byose bisa nk’ibishyira iherezo ku myaka 12 uyu muzamu David De Gea yaramaze muri Manchester United kuko yahageze muri 2011, ubu yemerewe kwishakira indi kipe ndetse amakipe yo muri Saudi Arabia yatangiye kumugera amajanja.
Ku rundi ruhande ikipe ya Manchester United yerekeje amaso mu Butaliyani mu mugi wa Milan mu ikipe ya Inter gushaka umuzamu ukomoka muri Cameroon w’imyaka 27 André Onana.
Kuri ubu Manchester United ikaba yamaze gutanga amafaranga miliyoni €39 kugira ngo irebe ko yakwegukana uyu muzamu. Ni mu gihe ariko ikipe ya Inter Milan yo ishaka miliyoni €60.
