Nyuma yaho ikipe ya Chelsea iguze abakinnyi benshi mu isoko ry’igura n’igurisha ry’abakinnyi ryo muri Mutarama, uko binjiraga ni nako bari gusohoka. Kugeza ubu Eduard Mendy, N’Golo Kante, Pierre Emerick Aubameyang, Romelu Lukaku, Tiémoué Bakayoko, Denis Zakaria na Kalidou Koulibaly, bose bamaze gutandukana na Chelsea, ku rutonde rw’abasohoka ruriho Ruben Loftus Cheek na Hakim Ziyech, ubu hiyongereyeho captain Cesar Azpilicueta na Christian Pulisic.
Captain wa Chelsea ukomoka muri Espagne Cesar Azpilicueta yavugwaga cyane mu ikipe ya Inter Milan gusa ubu amakuru agezweho ni uko ntagihindutse uyu mukinnyi w’imyaka 33 araza gusinyira ikipe ya Atlético Madrid yo muri Espagne imyaka ibiri y’amasezerano. Uyu mukinnyi wugarira ku ruhande rw’iburyo yaramaze imyaka 11 muri Chelsea kuko yahageze muri 2012.
Si Cesar Azpilicueta gusa kuko n’umunyamerika Christian Pulisic w’imyaka 24 nawe ku ijanisha rinini arasohoka muri iyi kipe ya Chelsea yerekeza mu gihugu cy’Ubutaliyani mu ikipe ya AC Milan.
Uyu musore utaha izamu anyuze ku ruhande bitegerejwe ko asinya amasezerano y’igihe kirekire nk’uko ibinyamakuru byo mu Butaliyani bikomeje kubitangaza.
