Nyuma y’ imyaka isaga 30 apfuye, ibisigazwa by’umubiri we, Thomas Sankara wahoze ari perezida wa Burkina Faso byitezwe ko bishyingurwa ahubatswe urwibutso rwe, ariko umuryango we uvuga ko utazitabira uwo muhango kandi kuko aho hantu “hadakwiriye kubera ibibazo hafite”.
Imirambo ya Sankara n’abari kumwe nawe 12 mbere yari yarahambwe mu irimbi riri hanze y’umurwa mukuru Ouagadougou, yataburuwe mu 2015, kubera impamvu z’ubucamanza.
Itangazo rya leta ryo kuwa gatanu ushize rivuga ko iyo mirambo izashyingurwa “muri uku kwezi kwa kabiri kwa 2023” kuri ruriya rwibutso.
Umuryango wa Sankara wasohoye itangazo risaba ko hakwiye “gushakwa ahantu hatuma imitima ituza, hadatanya abantu kandi hadatera uburakari”, uyu muryango uvuga ko aho leta yahisemo “hateje impaka kandi hatanavugwaho rumwe”.
Sankara afatwa na benshi nk’intwari ya Africa kubera politike z’iterambere ku buzima, uburezi n’ubuhinzi yagaragaje mu myaka ine yamaze ku butegetsi.
Sankara yafashe ubutegetsi kuri coup d’état mu kwezi kwa munani (8) 1983 ariko yicwa nyuma y’imyaka ine, mu yindi coup d’état yayobowe n’inshuti ye Blaise Compaoré – wagumye ku butegetsi mu myaka 27 yakurikiyeho.
Mu 2014, imyivumbagatanyo yagejeje ku iherezo ry’ubutegetsi bwe maze ahungira mu gihugu gituranyi cya Côte d’Ivoire aho urukiko rwa gisirikare rwa Ouagadougou rwahanishije Compaoré gufungwa burundu kubera uruhare rwe mu kwica Sankara na bagenzi be.
