Sosiyete y’Itumanaho ya Airtel Rwanda yatangije gahunda yo guha abamotari ubushobozi bwo gucuruza amafaranga ya Airtel Money n’ayo guhamagaza bagakora nk’aba
gahunda yatangijwe kuri uyu wa Kane tariki 11 Kamena 2020, ubwo abamotari batandukanye mu Mujyi wa Kigali bahuraga n’abayobozi muri Airtel bakabwirwa ibyiza byinshi babahishiye nyuma y’igihe bari bamaze badakoza imitwe y’intoki ku ifaranga kubera ibihe bya Guma mu Rugo. Babahaye n’udupfukamunwa.
Munganyinka Liliane ukora mu Ishami ry’Imenyekanishabikorwa muri Airtel Rwanda yavuze ko iyi sosiyete iri kugerageza gufasha abamotari gushyira mu ngiro gahunda zafashwe zo gukurikiza amabwiriza yo kwirinda Coronavirus hifashishwa ikoranabuhanga.
Ati “Tumaze iminsi muri gahunda yo gukangurira abamotari kwirinda icyorezo cya COVID-19 bo ubwabo ndetse n’abagenzi batwaye. Muri ibyo harimo kubigisha uburyo bakoresha telefoni zabo mu kwishyurwa kimwe n’uko umumotari ashobora kwibikira amafaranga yishyuwe kuri telefoni kuko simcard y’umumotari ubu yemerewe gukora nk’iy’umu Agent wacu kandi ya mafaranga ya komisiyo bahabwa motari nawe akayahabwa.”
Ku ikubitiro Airtel Rwanda yinjiye mu mikoranire na Sosiyete icuruza lisansi ya Mount Meru ku buryo umumotari uguze lisansi, kuri Airtel Money ye ahabwa amafaranga 50 y’u Rwanda kuri buri litiro aguze. Kwinjira muri iyi serivisi ukanda *543#.
Bizimana Alphonse usanzwe utwara abagenzi kuri moto yashimye Airtel uburyo ikomeje kubaba hafi, ashishikariza bagenzi be gukoresha serivisi zayo muri gahunda zabo zose.
Ati “Ibintu Airtel Rwanda iri gukora ni byiza cyane. Iri kurushaho kuduteza imbere. Nashishikariza bagenzi banjye b’abamotari gukoresha serivisi za Airtel kuko bazabona inyungu nyinshi.”
Airtel Rwanda ni yo sosiyete ya mbere y’itumanaho mu kugira abakiliya benshi mu Rwanda kuko babarirwa hejuru ya miliyoni eshanu, muri bo hafi miliyoni ebyiri bakoresha Airtel Money.
Airtel kandi ikorera mu bindi bihugu birimo Uganda, Kenya, Tanzania, Repubulika Iharanira Demokarasi ya Congo, Congo Brazaville, Nigeria, Gabon, Madagascar, Niger, Tchad, Malawi, Zambia, Ghana na Seychelles byo ku Mugabane wa Afurika
